We Witaj-źiśowni Mato Rizo w Žylowje maju wót septembera nowu wótkubłarku: 28lětnu Wiebke Šulcojc z města. Wóna jo absolwentka Dolnoserbskego gymnaziuma a wuštuděrowana źiwadłowa grajarka! Za źiśownju a serbske Witaj-gibanje jo to wjelgin dobre měšanje. A wušej togo rědke pśigóźenje, až něcht swójo doněntejšne pówołanje wóstajijo a se do Witaj-źiśownje „pśesednjo“. Kak jo se to stało?

Wiebke ma serbske kórjenje, jo z rodom z Bórkow. Jeje stara mama jo serbsku rěc wuměła. Wiebke jo ju teke wuknuła wót prědneje klase až do abitury na Dolnoserbskem gymnaziumje – serbsku rěc jo słušała k tym styrim facham na jeje abiturnem pśespytowanju.