Kśišow/Krieschow. Južo wjele lět jo jasne, až dorosta za ceptarske pówołanje za serbsku wucbu njejo dosć. K tomu pśiźo, až serbski sedleński rum rosćo, ale ceptarjow njebywa z tym awtomatiski wěcej.

Toś te problemy pak njamaju w Kśišowje. W tamnej zakładnej šuli jo direktorka Simone Golzbuderowa natwariła serbsku wucbu, ako jo 1997 na tu šulu pśišła. Kolegi su jej gronili, až móžo sebje to źěło a žariś, dokulaž starjejše to njekśě. Weto jo AG póbitowała a jo měła wjeliki wuspěch. Mjaztym jo serbska wucba regularna. A nic jano to: wót tych 147 wuknikow w Kśišowje ma 87 serbsku wucbu. To jo nejwuša kwota w cełej regionje.

To wšykno jo kněni Golzbuderowa sama wugbała. Wót slědnego šulskego lěta jo pak dostała pódpěru. Josephine Dušcyc (Duschka) z Bórkow jo tam pó góźinach serbsku wucbu pśewzeła. Tegdy jo hyšći studěrowała na ceptarstwo w Lipsku, mjaztym jo wuštuděrowana a ma referendariat w Kśišowje. Bydli něnt w Kósobuzu a jo namakała w Kśišowje za sebje idealnu šulu. Wóna móžo něnto južo groniś, až by se wjaseliła, gaby mógała napśecej tam wostaś.