Wjeliki politikum jo to pla Dolnoserbow, až Ministarstwo za kubłanje, młoźinu a sport (MBJS) co to nowe póstajenje za serbsku wucbu špatnjejše wugótowaś ako to doněntejšne. Škódu by dostali serbska tak ako bilingualna wucba tak ako pód smužku te familije, kótarež su pokazane na šulsku wucbu, gaž jich źiśi kśě wuknuś serbsku rěc.

Wjelike wócakowanja Serbow njejo wóna mógała tak pšawje dopołniś. Wjednica referata w kubłańskem ministarstwje Katrin Düringowa jo groniła, až nadawk jeje referata jo koordinacija, njamógu pak sami póstajiiś. Tak jo we tom wjelikem pšašanju, kake budu te ramikowe wuměnjenja nowego póstajenja, jano groniła, až ministaŕ Günter Baaske jo južo gronił, až licba „12“ wěcej njebuźo.

To groni, až mógu wukniki teke w mjeńšych kupkach serbsku wucbu dostaś. Ale jo se pokazało, až dejtej weto byś dalej minimalna licba wuknikow a tśi lětniki pśesegajuca wucba. Katrin Düringowa jo pak pódšmarnuła, až te lětniki deje byś susedne. Tam njedej byś tak, až 1., 2. a 4. lětnik deje měś zgromadnje wucbu. To su Serby drje wopacnje rozměli, jo gódała.