Chóśebuz/Cottbus. Na SerBlaBliźe sobotu wjacor su spominali na jubilej 15 lět serbskego radijowego magacina za młoźinu Bubak. Te tencasne a te źinsajšne gótowarje Bubaka su pśišli we radnej licbje do klubownje Dolnoserbskego internata. Sobuźěłaśerje serbskeje redakcije rbb su pśigótowali za gósći rědnu gósćinu z jěźu a piśim. A te angažěrowane „bubaki“ su dostali z rukowu wjednice Marion Stenseloweje cesne wopisma (Urkunden).

Ideja za młoźinske radijo w serbskej rěcy jo nastała pśed wěcej ako 15 lětami, we kreatiwnem miljeju młodych luźi, kótarež su wobsajźili spušćone dwóry w Łakomej. Te pšawe Łakomarje su pjerwjej wuśěgnuli, za tym, ako politika jo wusuźiła, až jich wjas a bliske Łakomske gaty budu se wótbagrowaś. Tam jo nachylu nastała chytša komuna z bogatym kulturnym žywjenim, teke serbskim. Pśeto mjazy tymi nowymi wobydlarjami jo se pśinamakała radna kopicka luźi ze serbskimi kórjenjami a absolwentow gymnaziuma.