Słyńcne nalětne wjedro prědny kóńc tyźenja w aprylu jo pśiwabiło wjelike šwity luźi do Serbskego kulturnego centruma Slěpe. Na jubilejnem jatšownem marku jo było zastupjonych wěcej ako 30 jajkamólarjow z Górneje a Dolneje Łužyce. Pśed jich blidami su se woglědarje śišćali, aby jim pśi mólowanju jajow pśez ramje glědali a se wopšašali. Mjazy jajkamólarjami su byli teke někotare něgajšne Łužycanarje, ako Carola Stauberowa a Jürgen Bens z Barlinja a Lothar Balting z Durinskeje. W srjejźišću su se wě stojali tradicionalne serbske mustry na pisanych jajach, mimo togo motiwy z pśirody a druge kreatiwne mustry. Ako mejstarje škrabańskeje techniki su se prezentěrowali Rainer Grosa ze Šprjejc, Kurt Pluta z Běłeje Wódy a Hubert Bartsch z Rěčic. Mimo nich su tam byli pśipódla dalšne dobyśarje wuběźowanja wó „Nejrědnjejše serbske jatšowne jajo“, ako Beatris Sachsowa z Mikowa. Toś to wuběźowanje kužde lěto wupisujo Spěchowański krejz za serbsku ludowu kulturu z.t. 20 lět mark serbskich jatšownych jaj w Serbskem kulturnem centrumje jo dobra góźba slědk glědaś.