Trjebin/Trebendorf. Brunicowy koncern LEAG jo rozsuźił 30. měrca, až co Miłoraz pśesedliś. Miłoraske same su zwětšego z tym spokojne. Južo 2008 jo we jadnom napšašowanju 87 procentow wobydlarjow za to zgłosyło.

Ale, tak jo gronił Peter Krause (74), nejstaršy cłonk Miłoraskeje wejsneje pśirady: „Wósebnje tych starych trjefi to pśesedlenje kšuśe. Za tych młodych jo lažćejše“.

23. měrca buźo w Trjebinje (Miłoraz słuša k gmejnje Trjebin) wobydlarska zgromaźina. LEAG co tam rezultaty měrjenja za proch a zogol pśedstajiś. Dalej źo wó dalšne wuwiśe brunicoweje jamy Wochozy II. W juniju dej byś zgromadne pósejźenje gmejńskeju radoju Slěpe a Trjebin, na wobyma pósejźenjoma z „nuznym padom Miłoraz“ na dnjownem pórěźe.

LEAG co Miłoraz ako wósebny nuzny pad pśipóznaś. Koncern stoj zasadnje k tomu dogronje, kótaryž su 2013 zgromadnje z gmejnu wujadnali. Tak jo gronił Thomas Penk, wjednik za rekultiwaciju a pśesedlenja pla LEAG na pósejźenju wejsneje pśirady w Trjebinje 5. apryla.