Kuždy kšywowy sćelak (Sendeanstalt) w Nimskej ma swóju rozgłosowu radu. Tam dej cełe wobydlarstwo kraja byś reprezentěrowane.To płaśi teke za rbb w Bramborskej a Barlinju, źož teke Serby su žywe. Toś ma Domowina to pšawo, někogo pósłaś, kótaryž zastupujo serbske zajmy. To jo wót lěta 2011 Babette Zenkerowa. Wóna jo we tej raźe zastupna pśedsedarka Programowego wuběrka. Jaden nadawk cłonkow teje rady jo wuzwólowanje intendanta abo intendantki. Z Patriciu Schlesingeroweju (intendantka rbb wót lěta 2016) jo se B. Zenkerowa juž dlej rozgranjała – wěcej źiśecych póstrowow dla.Teke howacej se stara wó program za źiśi. Južo dlej jo se procowała Sylke Laubensteinowa-Polencojc wót Załožby za serbski lud wó pšawa za dolnoserbske wusćelanje „Pěskowego mužyka“. Hyšći njejo wóna dalej pśišła, to jo komplicěrowana wěc, jo groniła. Ten nadawk jo něnto B. Zenkerowa pśewzeła. Wóna měni, až dolnoserbski „Sandmännchen“ buźo snaź ako app za smartphony abo licaki wiźeś. Bóžko móžo to hyšći dłujko traś. Howacej by B. Zenkerowa rada wiźeła wěcej wusćełanjow wó Serbach w nimskem programje.