Pódstupim/Potsdam. Dnja 26.04.2017 jo Domowina na peticiski wuběrk Krajnego sejma Bramborskeje zapódała peticiju. Wóna wobjadna planowanu změnu póstajenja za wucbu serbšćiny a za serbšćinu w bilingualnej wucbje. Mjazy drugim jo se planowało, wjelikosć kupkoweje wucby na minimalnje 12 wuknikow pówušyś, což by wucbu serbšćiny na wětšynje dolnoserbskich šulow wobgrozyło. Na protest Serbow jo se ministarstwo wót licby 12 zdaliło.

Pśedsedaŕ Domowiny Dawid Statnik groni k tomu: „Informacija wo planowanych změnach, teke wó licbje 12 wuknikow za kupkowu wucbu, jo nas šokěrowała. Z peticiju comy politiski signal daś, aby se krajny sejm hyšći raz z toś teju nastupnosću zaběrał. Źo wó pśichod serbšćiny w Dolnej Łužicy.“