Drježdźany/Dresden. Pśi góźbje rozšyrjenja oficielnego serbskego sedleńskego ruma w Bramborskej co frakcija Lěwice we sakskem parlamenśe nawlac nowu diskusiju dla serbskego sedleńskego ruma w Sakskej. Jich powědaŕ we serbskich nastupnosćach Heiko Kozel jo Casnikoju rozkładował, až pśi tom njejźo wó pśibiśe nowych komunow, ale wó to, aby južo we tych něntejšnych serbskich gmejnach wěcej za serbsku rěc a kulturu wugbali a dopołnili serbsku kazń.

To jo za zdaśim Kozela trjeba. Južo pśi póglědanju do interneta se wuznajo, až serbske nastupnosći graju we wjelikem źělu „serbskich komunow“ lěbda rolu. 13 gmejnow zgórjelskego wokrejsa (wót 15, ak słušaju do sedleńskego ruma) a 9 gmejnow budyšyńskego wokrejsa (wót 28) njamaju razka na internetowych bokach žeden pokaz na to, až słušaju do serbskego sedleńskego ruma. Amty njenałožuju zewšym serbsku rěc, aby se zjawnje prezentěrowali, a teke žedne wustawki k pódpěranju serbskeje rěcy njejsu wózjawjone.