Zachadny pětk jo Marion Kwicojc z Lipska dojěła do Raduša. W źiśowni „Marjana Domaškojc“ su južo cakali. How powěda 5 wótkubłarkow nimski ze źiśimi. Dwě (2) wótkubłarce wužywatej serbsku rěc, jadna w małej kupce, druga pla wjelikich źiśi. Wóna źiśownja se procujo, źiśam pśecej něco rědnego póbitowaś. Na pśikład du cesto do góle, aby te małe pśirodu spóznali. Wót zachadnego pónjeźele maju gólne tyźenje, 6 tyźenjow dłujko budu se kuždy źeń wupóraś do góle.

Zachadny pětk su wšykne glědali, ako Marion jo pśijěła z jeje małym busom, połnym instrumentow. Ako jo měła wšo wupakowane, jo nejžpjwerjej spiwała wuwitański spiw a jo źiśam pokazała wšake instrumenty. Klinkotawki (Klanghölzer), gitaru, violinu, tamburin, bubon: to wšykno jo wóna sobu měła a źiśam pokazała. Kuždy instrument jo šeł wót jadneje ruki do drugeje – to jo je kradu wjaseliło. Źo ga jo wacej góźba za małe waki, raz na fidlach graś?