Lubnjow/Lübbenau. Pisany spektakel z reju, temperamentneju muziku a ze swěźeńskeju atmosferu su dožywili gósći pśedslědnu njeźelu maja we grodowem parku. Zastupniki drastwinych, tradiciskich a domowniskich towaristwow z Lubnjowa, Bórkow a Wětošowa su pśepokazowali publikumoju serbsku drastwu, nałogi a kulturu.

Za eksemplom znatych drastwinych swěźenjow z 1930-ych lět w Wětošowje a Bórkowach (mjazy drugim organizěrowanych wót wětošojskego fararja Benjamina Biegera) jo ta tradicija se 2013 wótnowotki wótžywiła.

Pód motto „Drastwa rejujo“ jo dało stakim južo k pětemu razoju we nowem casu wóny luštny drastwiny swěźeń. Jen jo wótwóriła pśedsedarka błośańskeje informacije za turisty Christina Balkowa (Bahlke) we pśibytnosći 400 gósći. To cełe tšojenje stej moderěrowałej znajarka Błotow a awtorka knigłow Marlena Jědrowa z Lipjego a publicist a chronist Manfred Kliche z Raduša. „To jo dobra proba za Bramborski wejsny a žnjowny swěźeń, ak buźo w septemberu w Radušu“, jo wón nam gronił. Na tom dnju jo měł swěźeński frak woblacony a cylinder stajony.