W slědnem tyźenju, wót 22. do 28. maja jo wu nas był „7. Łužyski camp klimy a energije“. Pominanje wobźělnikow jo było, až fosilne palidła ako wugel, wólej a płun deje wóstaś w zemi. Nagromadu jo se 80-100 luźi wobźěliło na campje. Wjele jich bydli abo pochada z Łužyce, druge su pśijěli z Barlinja, Lipska abo pódwjacora. Hynac ako w slědnych lětach njejo „camp“ na stawnem měsće był, ale wobźělniki su kólasowali pó pótrefjonych stronach Łužyce a teke we wokolinje pólskego města Brody wóte jsy do jsy. Tak su jěli pósporomje bruneje Sprjewe, pśi brunicowych jamow a mimo milinarni.

Kuždu noc su pśenocowali we drugej jsy a su tam pšosyli na zjawne zarědowanje. Filmy a pśednoski su informěrowali wó slědach masiwnego wudobywanja surowiznow a źinsajšneje industrije. Pó filmach a pśednoskach su aktiwisty se rozgranjali z pśibytnymi wejsanarjami (jich jo raz wěcej a raz mjenej pśišło). Pśi droze su domacne politikarje a aktiwisty rozkładli wšake, což ma cyniś z brunicowymi jamami.