Chóśebuz/Cottbus. Wałtoru pó swětkach jo se zmakała k dalšnemu razoju pśigótowańska kupka za šulsku namšu. Beate Höppnerowa, ceptarka nabožniny na Dolnoserbskem gymnasiumje, serbska dušypastyrka z Dešna Katharina Köhlerowa a Christiana Piniekowa, pśedsedarka zastupna Spěchowańskego towaristwa za serbsku rěc w cerkwi a cłonk kupki serbska namša pśigótuju z dalšnymi akterami pó tśilětnej pśestawce znowa serbsko-nimsku šulsku namšu. 7. šulska namša stoj w lěśe reformacije pód motom Nowe teze trjeba kraj. Młoda wuknikojska źiwadłowa kupka šule pśgótujo graśe, šulski chor zwucujo pód nawjedowanim Geralda Schöna kjarliže, dujarje ewangelskego cerkwinego krejza Chóśebuz kśě wuwitaś namšarjow a techniku stajijo mjazy drugim Nimska cerkwja w Měsće k dispoziciji. Pó namšy wótmějo se šulski swěźeń Dolnoserbskego gymnaziuma k wobkóńcenju šulskego lěta, źož pśedstajiju wukniki a wuknice rezultaty swójogo źěła minjonego lěta.