W kjarcmje Zum Enddorn w Griebenje.Gódowny bom w domowniskem muzeju w Kloster.

Ewangelska wósada pśi Serbskej cerkwi w Měsće jo kazała prědny tyźeń w aprylu na tradicionelny nabóžny tyźeń, kenž se pśewjedujo pśi Baltiskem mórju na kupje Hiddensee. W sedlišću wobgóspódarjujo Kloster ewangelska cerkwja zmakański dom ze samozastaranim. Na nabóžnem tyźenju wó cerkwinem gronu lěta jo se lětosa wobźěliło 19 wósadnych gromaźe z fararjom Andreasom Jagdhuhnom, dłujkolětnym organizatorom toś tych tyźenjow. Dopołdnja a pó wjacorach wótměwaju se temowe rozgrona abo praktiska zaběra. Wótpołdnja ma kuždy wobźělnik a kužda wobźělnica wólny cas a póžywa pó swójom kśěśu a swójej kondiciji kupu z jeje muzejami, kafejownjami, lodkami a se wě, jeje kšasneju pśirodu: mórjo, płony a nagły brjog, fryšny mórski powětš. Žeden ciwilizatoriski zogol njemóli, dokulaž jo priwatny awtowy wochad na kupje zakazany. Wětšyna pśipušćonych awtow, na pśikład wórowe transportne jězdźidło a kupowy bus, su wugótowane z elektromotorom.