Chóśebuz/Cottbus. 15 wuknikow Dolnoserbskego gymnaziuma (DSG) jo měło slědny tyźeń wósebny program. Wóni ga su měli woglěd z Českeje. Wót gymnaziuma w Hořicach, partnarskeje šule DSG, jo ga było 15 wuknikow w Dolnej Łužycy. Česke wukniki su pśenocowali pla našych wuknikow doma, wob źeń su měli zgromadnje program. Wucba njejo pśi tom wjeliku rolu grała. Za to pak su wuknuli te młodostne 8. a 9. lětnika DSG a 7. do 10. letnika z Hořic druge wěcy. Na pśikład, kak mógu zapaliś wogeń jano z kamjenjom. Su ga byli pónjeźele w Dešnje, źož su w starosłowjańskem sedlišću „Stary lud“ teke druge wěcy wuknuli: pjacenje klěba a tkanje pśijaśelskich banśikow.

Apropos pśijaśelstwo: wukniki su se južo znali. „Naše“ źe su byli we nazymjem w Hořicach, a to ceły tyźeń a we partnarskich familijach. Tam su měli bogaty program, na pśikład z rěcnymi graśami. Woglědali su se teke muzej Boženy Němcoveje, wažneje českeje awtorki. Jeje romana „Źiwa Bara“ a „Babička“ jo pśestajiła Mina Witkojc do dolnoserbskeje rěcy.