Serbski muzeum na Młyńskej droze w měsće, ako se tuchylu pśetwarjujo a rědnjejšy wugótujo, jo we tych 23 lětach, ako wón wobstoj, nazběrał wjele, wjele eksponatow. Jano źěl z togo pak su mógali dotychměst w stawnej wustajeńcy a we wósebnych wustajeńcach pokazaś. To płaśi tež za wše te mólby a wobraze młogich serbskich a nimskich mólarjow, ako jo Serbski muzej kupił abo dostał darjone. Te nejrědnjejše a nejgódnjejše su byli k wiźenjeju w muzeju a wěsće změju wóni swójo městno w pśiducej nowej wustajeńcy Serbskego muzeja wót pśiducego lěta.

Zběrka takich mólbow a wobrazow w Serbskem muzeju pśecej dalej rosćo. Akle w maju su dostali nowy originalny akwarel, na kótaremž běšo znaty chóśebuski mólaŕ Karl Nowak (1873-1959) zapópadnuł Stare wiki w měsće, a to wót dweju luźowu z Hamburga. Wósebna nowosć pak jo cyklus z 25 wobrazami słowjeńskego wuměłca Karla Vouka, kenž jo žywy w Korytańskej/Kärnten w Awstriskej. Južo łoni jo Serbski muzej dostał prědny źěl cyklusa z 13 źěłami, a lětosa w juniju jo k tomu pśišeł drugi źěl z 12 twórbami. Z tym jo něnto ceły cyklus we wobsedstwje Serbskego muzeja.