Górjejbranje jo jadno tych tšojenjow we žywjenju, kótarež se stanu jano jaden raz. Kótarež su kradu wósebne a dla togo se cesnje swěśe a to z cełeju familiju. Wósebnosć togo tšojenja stej lětosa dwě źowći w Bórkowach kradu pódšmarnułej: Jasmin Lukasojc a Annika Tolksdorfojc stej dałej se górjejbraś w serbskej drastwje.
Wašnja górjejbranjow se pśiměrjujo modam casow. Kuždy wě, až su byli konfirmandki we serbskich stronach pjerwjej w burskej drastwje woblacone. W kradu cesnej carno-běłej. Tak to znajomy wót starych fotow a etnografiskich wopisowanjow. To jo staw slědnych lětźasetkow górjejbranjow w serbskej drastwje, někak w 1930ych lětach. Kak jo w casach pśed tym było, jo śěžko wuzgóniś.