Lipsk/Leipzig. Južo tśeśi raz jo lipšćański Institut za sorabistiku wuwitał wjelikopósłańca Irskeje, Michaela Collinsa, w Lipsku. Dnja 12. junija su se zmakali ze zastupnikami uniwersity, filologiskeje fakulty, Instituta za sorabistiku a studentami, aby powědali wó situaciji małych rěcow w Europje.

Wót lěta 2014 póbitujo Institut za sorabistiku Bachelor za europske mjeńšynowe rěcy, kenž dajo studentam doglěd do wšakich mjeńšynowych kontekstow a kulturow, wót serbšćiny, baskiskeje abo galiciskeje až do keltiskich rěcow. Irska financěrujo Institutu za sorabistiku južo wót lěta 2013 lektorat za irsku rěc. Dekan filologiskeje fakulty, prof. dr. Beat Siebenhaar jo pódšmarnuł na zmakanju, až ma uniwersita wažny nadawk, teke małe rěcy, kaž serbšćinu a iršćinu, pódpěrowaś pśez slěźenje a wucbu. Prorektor za mjazynarodne kooperacije, prof. dr. Thomas Hofsäss, jo pokazał na dłujke kontakty lipšćańskeje uniwersity do Irskeje wót srjejźowěka, pśez zachopjeńki modernego keltiskego slěźenja w 19. stolěśu až do źinsajšnego casa.