Dešno/Dissen. Kulowaty jubilej konfirmacije jo swěśiła 16. julija w dešańskej cerkwi kopica luźi. Wóni su byli ze wšakich starstwowych kupkow: mjazy 80. jubilejom a 25. jubilejom konfirmacije. Ten 80. jubilej, dubjanu konfirmaciju, jo swěśiła Ana Twarcowa, pśiduca jo była Helene Meršeńcowa z 75. jubilejom, teju kronjuwelnu konfirmaciju. 70. jubilej (gnadnu konfirmaciju) jo swěśiło južo pěś luźi rowno tak ako zeleznu (65 lět) teke z pěś luźimi. Dejmantnu (60 lět) a złośanu su ze źewjeś a źaseś luźimi swěśili. Pśi slobranem jubileju su se tśo muske wobźělili.

Taki swěźeń ze swěźeńskeju namšu doprědka jo dobry póstark, aby zasej ze noweju wótwórjonosću a fryšnym pózbuźenim glědali na swóju wěru. Wósadna fararka Katharina Köhlerowa jo we swójom prjatkowanju rowno na to pokazała. Wukniki Jezusa su spóznali we njom te wažne wěcy, dla togo su jomu slědowali. Njejo šło wó wjedro abo rozdrosćenje. Jubilary su dostali wót fararki žognowanje a wopismo. Za wšych jo było Bóže blido.