Barliń/Berlin. Zelene w Zwězkowem sejmje su gano dostali aktualne pówoblicenja źěłowych městnow pśez brunicowu industriju. Žrědło licbow jo pósudk „Zěłowe městna w brunicowych regionach – wuwiśe we Łužycy, w srjejźnej Nimskej a w rheinlandskem rewěrje“, kótaryž jo Zelenym wugótował běrow arepo consult z Barlinja.

Pišu, až we Łužycy (to groni w bramborskem a sakskem źělu Łužyce zgromadnje) jo mjenjej ako 7.900 direktnych źěłowych městnow w brunicowych jamach a milinarnjach. Tych indirektnych źěłowych městnow pśez nadawki LEAG drugim firmam lice z 5.000 do 10.000. W cełej Nimskej ma wokoło 20.000 luźi direktne źěłowe městno w brunicowej industriji a 22.000 do 54.000 luźi indirektne městno. We kuždem pótrjefjonem zwězkowem kraju jo późel direktnje pśistajonych źěłaśerjow w brunicowej industriji mjeńšy ako jaden procent, gronje pósuźowarki.

We pśirownanju z tym jo było hyšći w lěśe 2000 wušej 60.000 luźi w jamach za kamjeńtny wugel pśi-stajonych. Wobźěłarki teje studije śěgnu z togo konsekwencu, až strukturna změna njebuźo pla nas taka kšuta ako pjerwjej dla kamjeńtnego wugla.