Karsten Schreiber: co byś słužbywugbaŕ wšyknym bergarjam

Karsten Schreiber jo wótrosł w Gołkojcach a cesći serbske tradicije. Direktny kontakt njejo měł z tym serbskim we swójej jsy. Ale Casnikoju jo wulicował, až jo jomu nadpadnuło, až we tych slědnych lětach we wejsnych źělach wjelikeje gmejny Gołkojce to serbske jo kradu pśirostło. A jogo wjaseli, až su to młode luźe, kótarež to pógóniju. Na pšašanje Casnika, lěc Karsten Schreiber jo drje teke za serbsku rěc, jo gronił „se wě“ a až měni, gaž groni „tradicije“, až rěc jo z tym teke měnjona. Kandidat za amt šołty jo pón sam naraźił, až dej byś serbska wucba teke w gołkojskej šuli, gaž buźo tam nowa dalejwjeduca šula. A teke pólska rěc, dokulaž Pólska jo naš direktny sused.

Jaden jogo nejwažnjejšych zaměrow jo stwórjenje komunalnych parcelow za twaŕ bydlenjow. Gołkojce co wón ako atraktiwnu wjas zeźaržaś, źož luźe kśě bydliś.