Barliń/Berlin. Slědny tyźeń pětk jo wobradowała w Barlinju mjeńšynowa rada Nimskeje. Wót boka Serbow su se wobźělili cłonki zwězkowego pśedsedarstwa Domowiny Kito Ela, Bjarnat Cyž a Dawid Statnik.

Nejwažnjejšy tema togo regularnego wobradowanja jo było źěło za Minority safepack, jo gronił Casnikoju Kito Ela. Toś ta iniciatiwa na europskej rowninje pomina hyšći wěcej pšawow za narodne a rěcne mjeńšyny. Milion pódpismow kśě za tu akciju nazběraś, kótaraž běžy wót apryla togo lěta. Ale doněnta njejo se w Nimskej dosć za to stało. Su wobradowali k tomu, kak notne jo tu akciju dalej wjasć. „Musymy aktiwnjejše wordowaś a intenziwnjej pódpisma gromaźiś“, jo gronił Ela Casnikoju. Teke w interneśe dajo něnto móžnosć pódpisaś: www.minority-safepack.eu/.

Dalšny tema jo był pśigótowanje wuzwólowanjow zwězkowego sejma. Mjeńšynowa rada jo pšosyła strony wó wótegrono na pšašanja. Někotare wótegrona južo maju.

Kužda mjeńšyna jo měła pśigótowanu rozpšawu k tomu, kak tuchylu běžy. Kito Ela jo wó tom powědał, kak śěžko jo namakaś dorost we źiśownjach w Dolnej Łužycy.