Rowne/Rohne. Sobotu tyźeń, 18. awgust, jo rowniske wejsne źiwadło swěśiło swój 25. narodny źeń! Wóni su gósćam pokazali pitśku modernizěrowany kus „Die schlaue Bauers­tochter“ (pó bajce Grimmojc bratšowu). Pótom jo sajźiło něco małkego k jěźi a kafej. Gratulěrowat su jim pśišli mjazy drugim Serbski kulturny centrum, kantorki, Bierholdojc firma, Rowniske głose, power-žeńske, Serbski folklorny ansambel a pśedsedaŕ wejsneje pśirady Jörg Funda.

Za cas swójogo wobstaśa jo źiwadło pśisamem 600 raz wustupiło – wóno jo pokazało 35 bajkow, dwa směška, někotare domowniske kuse, wěcej ako 40 legendow, 150 skečow, jaden kabaretowy program atd. Wóno jo sobu gótowało na Njepilinych swěźenjach, we programach nałogi–drastwa–tradicija, we pśeśěgach, na Dnjach Saksow a Dnjach Bramborskeje, na festiwalach drastwy a na festiwalu graśa na měchawje. Wóni su pśepokazowali serbsku a połnimsku drastwu, a teke pśi dupjenjach a na swajźbach su byli pódla. Edith Pjeńkowa jo wót wšogo zachopjeńka cłonk źiwadła, a wóna jo jadna tych nejpilnjejšych wušywarkow we jsy.