Co jo jaden Wšuderkano a chto jaden serbski Wšuderkano? To jo luź, ako ma wjele žywjeńskich stacijow a pisane žywjenje, kenž rad drogujo a w kuždem politiskem systemje doma jo. Wón jen wita, do njogo wěri a jo rad za nim žywy. A taki jo był serbski luź Wylem Bjero. Ten slědny „towarišnostny porěd“ ako wón dolabujo, ten socializm, – kótaremuž słužy teke ako IM –, wordowašo jomu napšawdna a wěrna domownja. Glědamy raz za jogo měnjatymi, nic pśecej lažkimi žywjeńskimi stacijami:

5-lětnemu Drjejcańskemu gólcoju zamrějo mama; žywy w domje wótšego a napśiskego ceptarja Hurasa; študańc na ceptarskem seminarje w Nowej Cali (1916-1922); twarski źěłaśeŕ, handlaŕ; 1927 ceptaŕ, 1928-1941 Bórkowy-Kupy; wójak, zeleznicaŕ, źěłaśeŕ na Barlińskem lětanišću, gmejnski sekretaŕ w Bórkowach; 1954 zasej ceptaŕ na Kupach, tuberkuloza, kóńc ceptarstwa; pratyjaŕ a redaktor Nowego Casnika (až k swójomu 75. burstakoju!); wósebnosć: kšuty socialist; wažny funkcionaŕ Domowiny.

115 lět by Wylem Bjero 4. nazymskego došwyrnuł – napšawdu pak jo toś ten Drjejcanaŕ wordował 85 lět. Krotko do 86. narodnego dnja jo 26. jacmjeńskego zamrěł, a to buźo znowa prědk 30 lět.