Chóśebuz/Cottbus. Šula za dolnoserbsku rěc a kulturu jo stwórtk w klubowni Serbskego domu prezentěrowała nowe knigły k słuchanju „Ze žywjenja serbskich muskich“. To su južo stwórte take knigły z wulicowanjami maminorěcnych luźi, ako su nastali ako projekt šule – we nich wulicuju muske wót swójogo žywjenja. Te źaseśo wulicowarje, ako su na dwěma CDejoma słyšaś, su pó rědu: Wyli Gusor ze Žylowa, faraŕ Helmut Hupac z Prjawoza, Pawlo Końcak z Hochoze, Fryco Kšamaŕ z Drjenowa (roźony w Liškowku), Walter Rizo, Fryco Wojto, Werner Lehmann (wšykne tśo z Hochoze), Šułśic Richard (Matuš) z Depska, Alfred Kjarcmarik z Prjawoza (roźony w Smogorjowje) a Fryco Atko (Krüger) ze Strjažowa (mjaztym njabogi). Pśisamem wšykne wót nich su na tu prezentaciju pśišli.
Wót wósebnosćow rěcy wejsanarjow jo wulicował dr. Fabian Kaulfürst, ako jo jich rěc kradu analyzěrował a we knigłach rědny nastawk k tomu napisał a se wó transkripciju powědanych tekstow starał. Stakim móžo pśisłuchaŕ wše wulicowanja ned lazowaś a lěpjej rozměś.
