Trjebin pla Slěpego/Trebendorf. Pśi dalejpisanju brunicowego plana za wochožańsku jamu dej se na kuždy part glědaś na pótrjebnosći Miłoraza. To sebje pomina rada trjebińskeje gmejny (Miłoraz jo źěl teje gmejny) we swójom stojnišću (Stellungnahme). Brunicowy plan dej akle pótom zwólony wordowaś, gaž buźo za Miłoraz pśesedlarske wujadnanje pódpisane. We njom dej byś wobwěsćone, až pśesedlenje buźo socialnje znjasliwe a wóno dej se tak jěsno ak móžno staś. Gmejnska rada wobtwarźijo swójo pominanje tak: Wobsednikarje dwórow pśi Damje (źěl Miłoraza) muse tak a tak se pśesedliś, to jo wustawjone we brunicowem planje z lěta 1994. „Někotare su sebje južo kupili grunty a chopiju w nalěśu 2018 swóje domy twariś. Familije se rozryju“, stoj we wobzamknjenju gmejnskeje rady. Wóne wobydlarje deje pak nadalej wóstaś źěł miłoraskego gmejnstwa, a bydliś z miłoraskimi gromaźe w nowej jsy.