Město Chóśebuz derje a běžnje pódpěrujo wše procowanja a aktiwity Serbow za woplěwanje a zdźaržanje jich rěcy a kultury. Za to se zasajźujotej teke wósebnje wušy šołta a měsćański parlament. To jo Ana Kosacojc-Koselowa, zagronita za serbske nastupnosći w měsćańskem zastojnstwje, wu-zwignuła na pósejźenju měsćańskeje zgromaźiny 25. oktobra w Měsćańskem domje. Tak ako kužde lěto jo wóna teke lětosa dała rozpšawu wó swójom źěle a wó aktualnej situaciji w serbskem žywjenju w měsće.

Na zachopjeńku jo na to pokazała, až pó tych tśich lětach, źož płaśi nowolěrowana bramborska serbska kazń, jo pśecej hyšći dosć źěła, aby se wóna w praktiskem źěle pśesajźiła. Wósebnje wjelike su byli a dalej su procowanja na pólu serbskego šulstwa. Ako dobru wěc jo pódšmarnuła to, až kśě w centrumje města na jadnej zakładnej šuli załožyś móžnosći za bilingualnu Witaj-wucbu. To jo wjelgin wažne a wužytne wósebnje za źiśi, ako něnto w radnej licbje chójźe do Witaj-źiśownje „Villa Kunterbunt“. To słuša sobu do plana za dalšne wuwiśe šulstwa w měsće.