Janšojce/Jänschwalde. Njeźelu tyźeń su w tudskem muzeju se zmakali familije, źož se ze źiśimi serbski powěda. Tenraz su byli pódla šesć familijow z nagromadu wósymimi źiśimi we starstwje wót jadnogo až do wósym lět. Wóni su pśišli z města, Hochoze a Wjerbna.

Dr. Madlena Norbergowa z Rěcnego centruma Witaj, kótaryž wóne zmakanja serbskich familijow organizěrujo a pódpěra, a pśechadna wjednica muzeja Diana Šejcowa z Hochoze stej pśigótowałej za źiśi naglědnu licbu atrakcijow. Na nje jo cakało rědnje wupyšnjone blido z piśim, sadom a wšakim pakosćenim, a teke graśa kaž serbski puzzle, klocki a pupki. Dr. Norbergowa jo źiśam wobraźiła rědne materialije, ak su we slědnych mjasecach w Rěcnem centrumje zgótowali, mjazy drugim chytśe ilustrěrowane knigły „Cas ryśarjow“ a kniglicki „Insekty a pawki“.

Zogol a juskanje jo nachylu wopśestało, ako do jśpy stupił bog – kradu na tom dnju ga jo bog w Janšojcach wokoło chójźił. Źiśi a jich starjejše su pó rědu jomu zespiwali štucki abo zgronili špruchy – a za to su dostali pakśiki ze słodkosćami a wordowali z pšutom žognowane.