Wóno jo k późiwanju, wjele energije štycy hyšći na stare dny we tom cłowjeku. 6. december jo serbski komponist Hync Roj swěśił 90. narodny źeń w kjarcmje „Zum goldenen Tropfen“ w Klětnem, źož jo gratulacije pśiwzeł wót swójźbnych, pśijaśelow, kolegow-komponistow, wejsanarjow a wjelich dalšnych. Wón jo se zwjaselił dla gratulaciskego pisma rusojskego wjelikopósłańca (Botschafter) Wladimira M. Grinina. Wšykne su jomu wósebnje strowje žycyli. Pśeto z nim ma ten w Cymplu pla Klětnego naroźony jubilar južo někotare lěta cyniś. Wón pak se tej śěžkej chórosći staja, južo žedne lěta z mócneju wólu.