Z Gór/Guhrow. Górjańska gmejna buźo wótněnta mjenjej pjenjez za elektricu wudawaś. Łoni su we wšyknych lampach pśi drogach stare žaglawki (Leuchtbirnen) z nowymi LED-žaglawkami zaměnili. Za to njejsu musali nic ze swójeje móšyny pśipłaśiś. K prědnemu: 90% togo wudawka su wucynili spěchowańske pjenjeze wót banki. A teke ten wuškowny źěł wót 10 %, ako gmejna by dejała sama njasć, jo jim zapłaśiło nimske ministarstwo za nutśikowne nastupnosći. To jo groniła na woklapnicy pśed dwěma tyźenjoma šołtowka Kerstin Jaserowa (Casnik jo pisał).

Wobydlarje, kótarež bydle we połnocnem źělu jsy, změju něnto wěcej měra. Tam su kamjenjany flastaŕ na droze wóttergali a asfalt połožyli. To głušne „grimanje“ a derkotanje mimo jěducych awtow jo stakim wopśestało, a to se we jsy chwali.

Wobuzu maju na sportnišću, źož jo plumpa za woblewanje tšawy dokusow šła. Nowa buźo 4.500 euro płaśeś. Až to błomje se weto zeleni, lažy jano na łońskem wjedru – wóno jo se wjele dešća najšło. Howac by sportnišćo spalone było – jo šołtowka groniła. Pjerwjej su pśisajźili traktor k secenju tšawy. Jen su njepóznate złoźeje wukšadnuli.