Amt za porěd (Ordnungsverwaltung) Bórkojskego amta jo na to pokazał, až wognjowa wobora njejo za wšykno zagronita. Konkretnje źo wó to, až k jeje słušnosćam njesłuša wótpóranje wódy we piwnicy. Zastojnstwo pišo, až luźe cesto wołaju wognjowu woboru, gaž to zewšym njejo notne. Wšak jo rozměś, až luźe se bóje wódy, ako se najźo na jich gruntach a se lejo do pódlańskich chromow a piwnicow. Rozmjej: Gaž wobsejźarje njejsu izolěrowali swóje piwnice pó pśedpisach, abo grunty su zazyglowane, ga njamóžo wóda do zemje śac a pyta sebje někaku drogu „dołoj“. To groni, až wobsejźaŕ jo sam zagronity, swój dom, wjažu a wše twarjenja derje wobstaraś. Chtož ma „nisku wódu“ w piwnicy, ten móžo ju wuplumpaś z plumpu, ako móžo se we twarskem marku kupiś. Teke firmu móžo za to skazaś. To njejo tšachota we zmysle bramborskeje kazni za wobzwarnowanje pśed wognjom a katastrofami. Ně, to su słužby, ako luźe maju sami zapłaśiś. Wognjowa wobora how njejo pśisłušna, piwnice abo śpy kompletnje suche źaržaś. We takich padach dostanu luźe zliceńku. Lěpjej jo, sebje pěskowe měchy kupiś, aby byli wobzwarnowane pśed wódu we domje.