Z Chóśebuza/Cottbus. W Serbskem domje jo až do 20. apryla nowa wustajeńca z wobrazami. „Reja do raja/Tanz ins Paradies“ se jej groni a w njej móžomy se wopóznawaś z tym, co jo Marion Kwicojc z Lipska rědnego mólowała. Chtož jo pśichwatał 25. januara na jeje wótwórjenje, jo měł ned na dwójaki part swóje wjasele a spódobanje. Raz na tych dogromady 20 bildach a grafikach górjejce w klubowni a dołojce w Lodce. A drugi raz na tej muzice, z kótarejuž jo Marion Kwicojc tych něźi 50 gósći z cełeje Dolneje Łužyce rozwajseliła. Toś, wóna njejo jano mólarka, ilustratorka a grafikarka, ale rowno tak dobra spiwarka a muzikarka. Pśi njej słuša woboje gromaźe.