Ako firma „Cottbusverkehr“ jo pónjeźele k wěsći dałq, budu wót februara we busach teke dalšne zastanišća we serbskej rěcy pśipowědaś. Wóne zastanišća su wšykne někak zwězane z tym serbskim – a to wóni su: „Brjazyna, šula“, „Bórkowy, hotel Bleske“, „Bórkowy, šula“, „Bórkowy, dwórnišćowa droga“, „Děsno, gósćeńc“, „Drjowk, šula“, „Janšojce, šula“, „Libanojce, šula“, „Picnjo, damcolowa droga“, „Wětošow, Pestalozzijowa droga“, „Žylow, wognjowa wobora“ a „Žylow, wětšnikojski puś“. Teke we Chóśebuzu gronje pśi někotarych zastanišćach to serbske mě we elektriskej, na pśikład pśi měsćańskej promenaźe. Dalšne se pśipowědaju we engelskej rěcy. „Cottbusverkehr“ ma na swójich internetowych bokach teke serbskorěcne wopśimjeśe (a teke něco we engelskej, francojskej, arabiskej a rusojskej rěcy).

Ideju k nowym serbskim pśipowěźam jo měło bramborske Ministarstwo za wědomnosć, slěźenje a kulturu.To spěchowanje serbskeje rěcy jo teke wustajone we krajnem planje za wobchad do bliskosći (Landesnahverkehrsplan).

Napowědał jo te mjenja jaden študańc – jogo mě hyšći njejsmy mógali wuslěźiś.