Z Chóśebuza/Cottbus. Pěsnikaŕ Bernd Pittkunings jo we nadawku Ludowego nakładnistwa Domowina wudał zběrku basnjow we dolnoserbskej rěcy. „Basnikarska kjarmuša. Lyrika pó dolnoserbsku wót něga až źinsa“ se tym knigłam groni. We nich jo wušej 100 basnjow zgromaźonych, starych, nowych, originalnje dolnoserbskich a do dolnoserbšćiny pśestajonych. Klasikarje a hyšći njeznate awtory stoje how jaden pśi drugem. Ku knigłam słuša teke cd, słuchoknigły z 50 basnjami.

Stwórtk wjacor pśed dwěma tyźenjoma jo se w Chóśebuskem Serbskem domje gjarstka zajmcow zmakała, aby tu premieru nowych serbskich knigłow dožywiła. Pśedstajili su te knigły Bernd Pittkunings ako wudawaŕ, lektorka nakładnistwa Domowina Janka Pěčkojc de Levano, a wót serbskego rozgłosa znata Martina Golašojc.

Bernd Pittkunings jo wjacor wótwórił tak ako jo znaty, ako pěsnikaŕ. Wón jo spiwał jadnu swójsku skomponěrowanu baseń, ako jo teke we tych nowych knigłach wótśišćana.