Z Dešna/Dissen. Kradu 19. apryla togo lěta buźo to jadno lěto, až su załožyli w Dešnje w tamnem znatem gósćeńcu „Serbski dwór“ nowe serbske towaristwo z mjenim „Serbske koparje/Wendische Aus-wahl“. Pśisamem 40 luźi jo se na tom wobźěliło, 15 wót nich su se ned zapisali ako cłonk. Mjazy nimi njejsu byli jano młode balokoparje ze wšakich serbskich jsow, ale teke starše luźe a žedne wažne politikarje – prof. Michael Šerak z Dešna, cłonk bramborskego parlamenta, Harald Altekrüger, krajny raźc we wokrejsu SPN, dr. Michael Hajdan z Drjowka, dłujkolětny pśedsedaŕ wokrejsnego sejma SPN, Marietta Tzschoppe, šołtowka z Chóśebuza, a Fred Kaiser, cłonk wokrejsnego sejma SPN a šołta w gmejnje Dešno/Strjažow.

Až jo se we tom krotkem casu wjele stało a se pilnje źěłało, jo se pokazało na prědnej głownej zgromaźinje towaristwa „Serbske koparje“ 21. měrca. Pśisamem 30 cłonkow a dalšnych gósći jo se k tomu pśinamakało w Dešnje – to se wě, zasej w gósćeńcu „Serbski dwór“, kótaregož wobsejźaŕ Hermann Jahn, ten serbski blidaŕ, teke cłonk towaristwa jo.