Wjas Janšojce ma někotare źěle a z tym jo śěžko, něźi centrum jsy pó-stajiś. Nejskerjej jo jich pór – wšuźi, źož luźe se raźi zmakaju. Janšojski Serbsko-nimski domowniski muzej słuša na kuždy part k nim a to wót lěta 1996. Tencas su muzej w rumnosćach janšojskeje stareje šule (a něgajšneje źiśownje) załožyli. W awgusće lěta 1999 su něgajšnu brožnju na farskem dwórje napśeśiwo šule ako „muzejowu brožnju“ wuswěśili. Mjaztym wužywaju teke staru groź farskego dwóra sobu za wustajeńce.

Jo we cełem hyšći notne, ten muzej wósebnje pśedstajiś? Pšawidłownje ga piśu we casnikach wót zarědowanjow we tom muzeju. Ale: K prědnemu njejo na zarědowanjach pśecej móžnosć, sebje we měrje ceły muzej woglědaś. To dejał kuždy pak raz cyniś, kenž se za naš region a serbske žywjenje a tradicije zajmujo.