Z města Carhaix (Karaez) w Bretoniskej. 15 wuknikow tudskego Diwan-gymnaziuma jo wótpołožyło abiturne pisne pśespytowanje we matematice na bretoniski, rownož šulske ministarstwo Francojskeje njejo do jich póžedanja zwóliło a jo jim zakazało, pśi pśespytowanju bretonisku rěc nałožowaś. Wót togo tšojenja pišo regionalny powěsćowy portal Le télégramme Soir.

Wukniki riskěruju, až jich wugbanje njebuźo se pśipóznaś abo až wóni dostanu 0 punktow a njebudu jo stakim wobstaś. Za powěsću portala njejsu wót swójeje ciwilneje njepósłušnosći prědku wen nikogo informěrowali – jano jich starjejše a někotare wucabniki su jo wěźeli. Wóni pśisłušaju kupce gymnaziastow, kótaraž dwě lěśe wójujo wó wětšu prezencu bretoniskeje rěcy we pśespytowanjach. Dotychměst jo za powěsću portala jim jano we fachu geografija-historija pśiwdane, pśespytowanje we bretoniskej rěcy wótpołožyś.