Z Chóśebuza/Cottbus. Na jadnom twarnišću we Starem měsće (pśi Rěcnem brjoze a Młyńskej droze), su archeologi zachadny tyźeń namakali cyglowy pjac z 15. stolěśa. Wón jo wjelgin derje zeźaržany. Jogo jěsća (Ofenloch, hier: Brennraum) su 5 m raz 3,4 m wjelike. Derje jo se zachował spódk a murja (až na 1,6 m wusoko). Wót togo pišo portal niederlausitz-aktuell.de.

Pjac jo stojał direktnje pśi měsćańskej muri. Archeologi gódaju, až te cygle, ak su wordowali we pjacu palone, su słužyli k pórěźanju teje murje. Móžo byś, až pjac jo nastał za tym, ako Husity we lěśe 1429 su Chóśebuz wobstupili a měsćańsku murju wobškóźeli. Ale wěste to hyšći njejo: pśeto teke Nimska cerkwja jo se we 15. stolěśu spaliła a k jeje natwarjenju su wordowali tejerownosći cygle pó­trjebane – jo portaloju gronił wjednik měsćańskego muzeja Steffen Krestin.