Na kóńcu junija – wót 21. do 24. – jo se wudała wětša serbska kupka ze pśisamem 50 luźimi z Dolneje Łužyce do Dańskeje. Su to byli balokoparje a trenarje z mustwa „Serbske koparje/Wendische Auswahl“ a z nimi gromaźe dalšne cłonki togo nowego serbskego towaristwa a młode Domowinske cłonki z Dešna, Žylowa, Gołbina a z Bórkow.

Pśepšosył běšo jich južo łoni tamny „Bund Deutscher Nordschleswiger“. Jo to organizacija tych tamnych wokoło 15.000 luźi, ako pśisłušaju nimskej ludowej kupce, nimskej mjeńšynje, ako bydli gromaźe z Danami w pódpołdnjowem źělu Dańskeje, pśi granicy k Nimskej.