Bart, w Malešańskej gmejnje, ze swójim gatom wesrjejź jsy, ewangelskeju cerkwju, rědneju najsu, grodowym parkom ze šulu a dwójorěcnymi napisami pśi mnjo ako woglědaŕ teje jsy pśijazny zaśišć zawóstajijo. Rědne zagrodki a chytše bydleńske domy mě pśeraźiju, až se te jadnab 400 wobydlarje how derje cuju. Kóńc 19. stolěśa jo profesor Arnošt Muka w Bartu licył mjazy tegdy 513 wobydlarjami 425 Serbow. W lěśe 1956 jo jich było 54,6 procentow. Źinsa how jano gjarstka luźi serbski powěda.

Koncertowa pianistka, solistka a improwizatorka Heidemarja Wiesnerec z Barlinja pśiźo pśecej rada domoj do Barta. Tudy jo ze swójimi tśimi sotšami a bratšom pśežywiła rědne źiśetstwo. Jeje starjejšej wjeźotej źěłarnju za motorske a kólasa a stara maś, Helena Mjeltcyna, wjeźo pśipódla tankowarnju. Wót njeje jo tegdy ako młode źowćo zgóniła, až běštej starka a starki Měrćin Mjeltka zagóritej cłonka serbskego sportowego towaristwa „Sokoł“. Wobej běštej tam kulturelnje wjelgin angažěrowanej. 49lětna wuměłcowka jo zasej raz do Barta pśijěła a ja som se tam z njeju zmakał, aby mě wulicowała wó swójom žywjenju a wuwiśu.