Chto njejo se hyšći sam fotografěrował, wótmólował ze swójim handyjom, ze swójim smartfonom a jo te selfije pón rozpósłał swójim znatym a drugim luźam, cesto pó cełem swěśe?

Chto pak jo južo sam swójo woblico mólował, z wołojnikom abo z barwu? To drje njejo tak lažko, za to musyš měś talent a lušt do mólowanja, do wuměłskego źěła.

Jaden taki, ako to wjelgin derje wumějo, jo Horst Jurtz z Běłeje Wódy. Ten źinsa 84lětny ga jo chopił južo w casu DDR mólowaś a kresliś a źěłaś ako grafikaŕ. Ze 30 wobrazami jo se něnto wudał do Chóśebuza a te su k wiźenjeju až do 12. oktobra w Serbskem domje. How w Chóśebuzu a Dolnej Łužycy njejo wón ze sakskeje Běłeje Wódy kradu cuzy. Južo tśi raze ga jo se ako mólaŕ a grafikaŕ w Serbskem domje pśedstajił, a jaden raz jo był wobźělony na zgromadnej wustajeńcy wšakich łužyskich a serbskich wuměłcow.