Z Bórkow/Burg. Tych wjelikich zarědowanjow za turistow maju w Bórkowach wjele. A něnto druge lěto jo tam dalšna atrakcija: Festiwal „Twarog a lany wólej“. Tam jo wjele kulinariskich póbitowanjow, ale wósebnje wjele rucnikarskich tradicionalnych z našogo regiona. Su tam pokazali źěłanje lana, klapanje kóse a wjele wěcej. Pśi tom su wjelgin na to tradicionalne glědali a wósebnje dej se chwaliś, až serbska rěc jo tam rolu grała.

Organizěrowany jo wót chóśebuskeje agentury „Pool production“. A wóni su sebje wuzwólili ako městno Park za wustrowjenje a powěsći (Kur- und Sagenpark). Rozdźěl k drugim zarědowanjam w Bórkowach a Błotach jo, až dejš tam zastup płaśiś. A to sedym euro, w pśedpśedani šesć euro.

Za to su měli te woglědarje slědny kóńc tyźenja sobotu a njeźelu rědnu a měrnu atmosferu we tom parku za wustrowjenje a powěsći. Luźe su sebje mógali stare rucnikarstwa woglědaś, a teke ludowe wuměłstwo ako na pśikład jajamólowanje a wušywanje serbskich cypjelow. Nowše wěcy ako Serbski modern, źož su luźe se zajmowali a kupili, su byli pśidatnje tam.