Z Chóśebuza/Cottbus. Wukniki sedymego lětnika Dolnoserbskego gymnaziuma su zachadny tyźeń wałtoru a srjodu woglědali do Serbskego domu a měli góźbu se zmakaś ze zastupnikami wšakich serbskich institutcijow. K tym samym su słušali Załožba za serbski lud, Domowina, Serbski ludowy ansambel, Serbski institut, Ludowe nakładnistwo Domowina a Nowy Casnik. Wušej togo su woglědali do Serbskego muzeja, serbskeje redakcije rbb, Dolnoserbskego internata, Rěcnego centruma Witaj a ABCeja, kaž teke do radnice, źož su se zmakali ze zagroniteju za serbske nastupnosći w měsće Annu Kósacojc-Kozeloweju. To rozgrono ze zastupnikami jo měło formu speed-datinga: wukniki su měli krotke pšašanja pśigótowane a su pó jadnom abo pó dwěma chójźili wót blida k blidu a se pšašali: mjazy drugim za lětom załoženja institucije a za nadawkami a słušnosćami, kótarež te institucije deje dopołniś. Źěł wuknikow jo wuknuł južo w zakładnej šuli serbsku rěc, někotare pśidu z wokolnych serbskich jsow a maju swójźbne, ak serbski wuměju.