Z Budyšyna/Bautzen. Serbski ludowy ansambel wusći se pó lěśojskej pawzy na nowu grajnu sezonu w Dolnej Łužycy. Srjejź oktobera budu wóni nejpjerwjej pokazaś we źiwadle Piccolo w měsće nowy folklorny program Naša Hanka w wěncu stoj – Swajźbarske parle. Tenraz buźo se to tšojenje na jawišću wjerśeś wokoło tradicionelneje serbskeje swajźby. K tomu słuša rejowarska scena „Pśiswajźba“ (=Polterabend), to buźo prapremjera z kompoziciju Liany Bertókoweje. Pśiglědarje budu wiźeś styri tradicionelne swajźby: z našych dolnołužyskich stronow, katolsku swajźbu z Górneje Łužyce, a teke swajźbu ze Slěpego a z Blunja. Graś budu se kompozicije Detlefa Kobjele, Korla Awgusta Kocora a Jana Pawla Nagela.

Kóńc nowembera kažo SLA starjejšym a źiśam na familijowe zarědowanje „Maks a Moric“ w nimskej a serbskej rěcy do konserwatoriuma w měsće. To buźo „koncert we bildach“ z powědarjom za źiśi wót 6 lět a starše.

Program k zapustoju budu w januaru pśedstajiś na Komornem jawišću w měsće, w Złośanem plonje w Hochozy a w kjarcmje Górne Błota w Nowej Niwje.