Z Bórkow/Burg. Pśedsedaŕ towaristwa Pónaschemu Uwe Gutschmidt wumjetujo Serbskej raźe, až diskreditěrujo w Pódstupimje aktiwity jogo towaristwa. Pśeto: Pónaschemu wabi aktiwnje k wu­zwólowanju Serbskego sejma z argumentom, až jich kandidaty budu wójowaś wó zeźaržanje a wukšuśenje bórkojskeje wušeje šule (źož wukniki maju Witaj-wucbu). Z tym namakuju wóni wótwórjone wušy wjelich Bórkowarjow, dokulaž w Bórkowach kněžy se tšach, až pśez planowanu nowu cełkownu šulu w Gogolowku pśiźo bórkojska šula do tšachoty. Pśedsedaŕ Serbskeje rady Torsten Mak jo zjawnje cwiblował, lěc jich pilnowanje ma zmysł: Serbski sejm njebuźo tako za tu wěc kompetentny a njezmějo žedno grono we tej nastupnosći, dokulaž take wobzamknjenja stanu se hynźi, we ceło drugich gremijach (NC jo pisał).