W pśedslědnem Casniku (NC 12 wót 12. septembra) smy pśinjasli rozpšawu wót prezentacije melodijow, ak Mina Witkojc jo napisała. Akle pó wózjawjenju smy wumarkowali, až smy awtorce mimo wótglědanja zmólki pśisunuli. Rozmjej: Smy dostali tekst w nimskej rěcy. To wót Bärbel Schubertoweje napisane smy na dnju redakciskego kóńca pśestajili do serbskeje rěcy, wšak smy Wam kśěli prezentěrowaś to cełe tak aktualne ako móžno w nejžblišem wudaśu a na prědnem boce. A se wě, až smy kśěli pśinjasć artikel wó Minje Witkojc na serbski.

Teke tam jo płaśeło, což płaśi za kuždy pśiposłany tekst: Redakcija ma pšawo a winowatosć, tekst wobźěłaś, aby se derje cytał a rozměł. Wjelgin cesto redakcija krotcy teksty, a redakciji pśistoj, napismo pó-stajiś. Toś jo se redaktorka dała na pśestajenje a wobźěłanje. We tom jo jadna a druga njeluba zmólka namakała swóju drogu do artikela a jo na młogem měsće skazyła korektnosć faktow. Kśěli nam naše cytarki a lazowarje to wódaś.