Z Rownego/Rohne. Swěźeń na Njepilic dwórje sobotu tyźeń jo se wjelgin derje raźił. Słyńcko jo rědnje swěśiło, a woglědarje su pśišli we wjelikej licbje. Cłonki Njepilinego towaristwa a pomocniki su se za casa póstarali, až na nicom njejo brachowało. Nic jano na programje su gósći měli spódobanje, ale teke na tom zastaranju z rolnikarskimi produktami. K jěźi jo dało dosć a nadosć, teke źěk drugim towaristwam ze slěpjańskeje wósady: forele wót wuźarjow, swinjece placa wót pjerinarjow, serbsku jěsć wót žeńskich Njepilinego towaristwa, jěšnicu wót trjebinskego flejšarja, a wjele sortow mazańca. Jaden bazar su pśigótowali starjejše a stare starjejše wuknikow klase 4a zakładneje šule w Slěpem. Pjenjeze, ako su z tym mazańcom zasłužyli, budu se nałožyś za šulske wulěty. Wjelgin póžedany jo był zasej Njepilic burski klěb z Tšamaric pjakarnje. Slěpjańske pcołkarje su pśedawali mjod.