Wóna jo ta jadnučka šlodarka – a to z lodu – w katolskich Serbach w Górnej Łužycy, ako šyjo a pórěźa serbsku katolsku drastwu. Jo to Serbowka Petra Kupcyna, 50 lět młoda, doma we Worklecach/Räckelwitz a lětosa w měrcu jo wóswěśiła 25lětne wobstaśe swójeje pśedawarnje „Šlodarnja & drastwy“.

Ze swójeje šlodarnje móžo rědnje glědaś na blisku zagrodku a na cełu krajinu pśi Kloštarskej wóźe (to jo how jadna znata rěcka). Ale teke jeje šlodarnja ma we sebje něco romantiskego. Nad šyjarnymi mašinami wise na sćěnje delki z ki- jaškami, natykane z rulkami žyźanego cwjerna, w młogich rědnych barwach. „Toś te delki jo mě mój cłowjek napórał, až južo njemusym pśecej zasej rulki z kašćikow wupytaś, což jo było za mnjo cesto wobśěžne, som trjebała za to pśecej wjele casa. Něnto pśirownujom jadnotliwe sukna jano z barwu toś tych rulkow. Tak mam za šyśe wótpowědny cwjern wjelgin spěšnje we rukoma“, wóna groni.