Ku komentaroju I. Neumanojc „Su naše Koparje te, ako móle? Abo te, kótarež maju samske pšawo?“ w NC 47/2018

Z komentara I. Neumannojc k problematice serbskeje kopańce som mógał wucytaś, až se cuju někotare Dolnoserby zasej raz pódtłocowane wót někotarych Górnoserbow. Take zacuśa znaju južo 30 lět. Kaž se zda, jo zgubił pśeliš wjeliki źěl Dolnoserbow ze socializmom teke swóje sebjewědobnje a pokažo se něnto rad ako wopor wšyknych. Som teke wucytał, až górnoserbskim koparjam taka chórosć njejo znata. Mógu derje rozměś, až dolnoserbske mustwo by se rad ako cełk wobźěliło na Europeaźe FUEN w lěśe 2020. Ako fanatiski Serb mam samo naźeju, až do togo lěta wumějo kuždy dolnoserbski kopaŕ někak sto serbskich słowow, dokulaž pla wšyknych drugich mustwow takego turněra jo nałog, rěc swójeje narodneje mjeńšyny wobkněžyś.