Zasej smy musali se rozžognowaś wót serbskich luźi. W decemberje jo smjerś Bjarnata Rjentša a dr. Guntera Spießa wobtužyła wjele luźi. 2018 jo wósebnje wjele serbskich muzikarjow wumrěło: w maju smy žałowali wó Detlefa Kobjelu a we nazymjem wó Hanza Hüttena. Zwězany z nimi jo był Ludwig Kola, „pioněr“ a dłujkolětny wjednik dolnoserbskego radija. A nic jano we Zaspach jo zawóstajiła drastwinarka Marlies Šmolkowa wjelicku źěru. Foto: M. B.W nowemberje jo było prědny raz pśepódaśe myta Miny Witkojc. Myto jo za wósebny angažement na pólu našeje rěcy. Swěźeńske pśepódaśe w Bórkowach jo było wjelgin raźone. Kita „Mato Rizo“, kótaraž jo dostała to myto, jo pśigótowała rědny program źiśi. Na fośe pśepódajo pśedsedarka šulskego towaristwa L. Budarjowa (napšawo) źiśam dar. Foto: I. N.

Kužde lěto zasej? Ně, 2018 njejo było wšedne lěto. Nic na cełem, wjelikem swěśe a rowno tak nic pla nas, we małem swěśe Dolnoserbow.

Dwě wěcy stej se stałej, ako pśed pěś lětami njejo se nichten pśedstajiś mógał: Nowowudaśe bibilije a wuzwólowanje serbskego parlamenta.